Mayroon nag-forward sa akin ng isang video sa YouTube ng umano’y coach na pinanggigilan ang kanyang mga manlalaro. Sa aking paningin ay may ilan sa mga ito ang pinagsasampal niya sa galit. Medyo malabo na rin kasi ang aking mga mata kaya baka naman napansin niyang masyado nang pawisan ang mga ito kaya ipinasya niyang tuyuin sila sa pamamagitan ng sapok.

Itong coach na ito ay katangi-tangi dahil siya ay nakapagpa-champion ng kanyang mga koponan sa NCAA at NAASCU nang sabay. Mukhang pinagpahinga muna si coach dahil sa patong-patong na kontrobersiya. Siya na nga ang itinuturo ng iba na pasimuno sa mga anomalya ng “age-fixing” sa NCAA, ngayon kumalat pa sa internet ang ebidensiya ng kanyang mga paglalambing.

Sang-ayon ako sa desisyon ng PCU na huwag munang sumali sa NCAA noong isang taon. At sang-ayon din ako sa desisyon ng NCAA na bilang kapalit ng penitensiya ng PCU ay huwag nang ungkatin pa ang mga nakaraang katiwalian nito. Pero sabi nga ng isang tanod dito sa barangay namin, “Ser, onli in da Pilipinas! Mula grade school dumiretso sa college. Ni hindi man lang nakatikim ng kahit isang araw ng high school. Champion, Rookie of the Year at MVP pa. Ngayon, PBA star na.” Huling season na raw ito ng PCU sa NCAA. Sa ibang liga na lang daw sila makikilaro. Sa mga hindi masyadong dalubhasang magbulatlat ng mga baho.

Sa NCAA, nagkameron na ng usapang lalaki na wala nang magpapaputok bigla ng TRO tulad noong isang taon. Ito ang naging bunga nang i-suspend ang isang Red Lion na nagpa-draft daw sa PBA nang walang pahintulot. Ang kasunduaang ito ay nabuo pagkatapos na muling ma-disqualify ang isang Red Lion dahil sangkot daw ito sa bestselling PCU Scandal na available na raw on DVD clear copy. Ang disisyon na ito ng Mancom ay isinantabi naman ng Board at biglang pwede na palang maglaro itong Red Lion na ito. Para naman yatang sinampal makailan ang Mancon sa pagbaligtad na ito. Nag-Mancom ka pa! Eh, brasuhan lang naman pala ang manyayari sa itaas.

Habang pinapanood ko ang finals ng FilOil-Flying V Tournament nitong nakaraan, hindi maalis-alis sa isip ko kung gaano kaswerteng nilalang ang coach ng San Beda. Magmana ka ba naman ng isang champion na koponan na hinog na hinog na. May isang litrato akong nakita mula sa huling season ng NCAA kung saan si coach ay binubuhat ng kanyang mga manlalaro at lahat sila ay mukhang halos mabaliw sa saya. Ang larawan na ‘yon ang kwento ng buong season nila. Buong season pinasan ng mga manlalaro ang menos pa sa galing nilang coach. Sa lakas ng koponan nila ay pinagmuntikanan pa silang malaglag. Sa mga oras ng kagipitan, ang mga manlalaro ang nagsalba ng natutulalang pang coach.

Nag-champion ang UE sa FilOil-Flying V Tournament dahil kumawala si Paul Lee sa 4th Quarter. Nag-umpisa sa isang 3-point play, tapos LIMANG sunod-sunod na tres at dalawang pahabol na free throw. Beinte. Beinte puntos sa isang quarter! Dikit ang laro tapos magpapakatay ka sa isang galing sa bankong manlalaro? Dito sa amin, kapag nakadalawang magkadugtong na tres ka, pinapayuhan ka nang huwag na man lamang sumubok pumukol muli kundi mayroon nang mangyayaring ‘di kanais-nais sa ‘yo. Anong klaseng coaching naman ‘yan? Si Kobe Bryant ba ‘yan na kahit anong depensa ay kayang lusutang mag-isa, o hindi lang talaga kinayang basahin ng coach ang sitwasyon kaya hindi nakapag-adjust? Malayo kasi ang upo ni Kuya kaya hindi naagapang mabulungan si Bunso.